كشفت الفنانة يسرا اللوزي عن تفاصيل علاقتها بابنتيها وطريقتها في التعامل مع ضغوط العمل والحياة اليومية، وذلك خلال ظهورها في برنامج “كلمة أخيرة” مع الإعلامي أحمد سالم عبر قناة ON.
وقالت يسرا اللوزي إنها تحاول دائمًا أن تكون قريبة من بناتها بشكل إنساني وصادق، موضحة: “بحاول أعلّمهم إنهم يحسوا بيا، وبحاول أوريهم ضعفي، يشوفوني وأنا بعيط أو منهارة أو مرهقة من التصوير ومش قادرة أقوم، علشان بقالي يومين مش نايمة”.
وأضافت أنها بدأت تلاحظ أن ابنتيها أصبحتا أكثر فهمًا لاحتياجها للمساحة الشخصية، قائلة: “بدأوا مؤخرًا يفهموا إنهم يدوني مساحة، لأن أوقات بيبقى في وش تاني بيظهر غصب عنك، وش فيه عصبية كتير، والإنسان لما بيكون مرهق ومتوتر مش بيبقى أحسن نسخة من نفسه، وأنا مش عايزة أوريهم النسخة دي، فبقرر أبتعد شوية”.
وتابعت موضحة أنها اكتسبت هذه الخبرة مع الوقت: “زمان مكنتش عندي الوعي ده، كان ممكن أعصب غصب عني، ومش عايزة يجيلهم تروما، فبقيت أحاول أستحمل وبعدين أهدى بعيد عنهم، لأن حصل مرة إني انفجرت قدامهم واتخضوا، وساعتها اتكلمت مع الدكتورة المتابعة لحالتي ونصحتني أبعد قبل ما أوصل للمرحلة دي وأرجع لهم وأنا أهدى”.
كما أشارت إلى اختلاف وعي الجيل الحالي عن الأجيال السابقة، قائلة: “الجيل ده عنده وعي أكتر من جيلنا، وبقى بياخد باله من التفاصيل، وإحنا زمان كنا بنصدق أي حاجة”.
واختتمت حديثها بأنها تحاول تعليم بناتها فكرة التوازن في الحياة، موضحة: “بحاول أعلّمهم إزاي نعيش بتوازن، يشوفوا قدامهم حد بيحب شغله وبيشتغل على نفسه، وفي نفس الوقت مهتم ببيته وأسرته، علشان يتعلموا إن لازم كل واحد يعمل حاجة بيحبها ويحقق فيها ذاته”.
